DAVAO CITY – Imbestigahan sumala pa sa konseho ning siyudad ang contractors ug uban pang in-charge sa maintenance sa mga traffic posts sa siyudad kini human ang ulahing insidente diin usa ka estudyante ang namatay human nakuryentehan.
Kahinumduman nga namatay sa milabay nga semana si Laurence Allen Barrios Siarot, 19, Grade 11 student, human nga natamakan niini ang basa nga parte duol sa poste sa traffic light sa Panacan ning siyudad.
Sumala pa kang konsehal Diosdado Mahipus, nga subay sumala pa sa nahipus nga report, adunay gipahigayon nga inspeksiyon sa milabay nga bulan sa Setyembre diin gigahinan kini sa dakbayan ug P10 million alang sa repair, replacement, rehabilitation, ug maintenance sa traffic posts.
Imbitahan sumala pa sa konseho sa mosunod nga sesyon ang mga representante gikan sa Public Safety and Security Command Center (PSSCC), City Transport and Traffic Management Office, Davao Light and Power Co., police responders ug investigators, ingon man ang contractor nga gitahasan sa pagmentina sa traffic posts.
Kinahanglan sumala pa nga masayran ang detalye sa maong insidente ilabi na nga gigahinan ug pundo ang maong proyekto.
Samtang miduso sab si Konsehal Dante Apostol ug resolusyon diin gi-awhag niini ang tanan nga mga local agencies nga magpahigayon ug inventory sa tanan nga mga traffic posts sa dakbayan.
Una ng nanawagan ug hustisya si Danilo Policarpio, igsuon ni Siarot gumikan sa gidangatan sa iyang igsuon.
