Gitutokan karon sa mga sakop sa kapulisan ang bangi sa negosyo isip usa sa mga motibo sa pagpusil sa negosyante nga padayong gi-obserbahan ang kahimtang.
Una ng gibutyag ni Police Major Reuben Libera, hepe sa Sasa Police Station nga duruha ka mga suspek ang responsable sa pagpusil sa biktima nga si Paul Andre Fabian Diaz, 27-anyos, residente sa Brgy. Wilfredo Aquino, Agdao District ning siyudad.
Kahinumduman nga naghatud lamang sa iyang anak ang biktima ug pag-abot niini sa may Mamay Road, Brgy. Angliongto ning siyudad, kalit nga mibutho ang mga suspek nga sakay sa motorsiklo ug dayon kini nga gipusil.
Nakapadagan pa sa iyang sakyanan si Diaz ug nakapangayo ug tabang sa outpost sa pulis hinungdan nga nadala kini sa balay tambalanan.
Dugang imbestigasyon ang gihimo karon sa otoridad aron nga masayran ang posibleng mipaluyo sa planong pagpatay sa biktima.
