DAVAO CITY – Gipahugtan pa karon sa Davao City Police Office (DCPO) ang ilang pagpatuman ug seguridad sa dakbayan human ang nahitabong terror attacks sa nagkadaiyang areas sa Mindanao sa milabay nga mga semana.
Una ng gibutyag ni Capt. Nolan Tagsip, tigpamaba sa DCPO, pabilin sumala pa sila nga alerto sa bisan unsa man nga pagpangatake dinhi sa dakbayan ingon man sa mga worst case scenario.
Pipila sa mga security measures nga ilang gipangandaman mao ang bag-ohay pa lamang nga simulation drill sa DCPO camp, kalakip na ang no backpack ug no jacket policies sa pipila ka mga lugar sa siyudad, maximum security zone sa San Pedro square, ingon man random ug fixed checkpoints.
Ipadayon sab sumala pa nila ang training sa ilang personahe aron nga mapalambo pa nila ang ilang katakos ilabi na panahon sa pagresponde sa bisan unsa man nga klase sa bahad.
Gi-awhag sab ni Tagsip ang matag usa ilabi na ang komunidad nga ipabilin ang koordinasyon sa law enforcers alang sa ilang kaluwasan.
