DAVAO CITY – Gibutyag ni HOG Farmers Association of Davao president Eduardo So nga adunay dyutay nga pag-ubos sa pork consumption sa dakbayan sa Davao human ang pagdeklara nga nakasulod sa Luzon ang African Swine Fever (ASF).
Subling gipasabot sa opisyal nga ang ASF dili mohatud ug bahad sa panglawas sa mga tawo inay nga sa mga alagang baboy lamang.
Giduso na sab nila ang rekomendasyon sa ASF Task Force ug naglaom sila ug usa ka resolusyon gikan sa City Council.
Gitataw sab sa nahisgutan nga kabahin sa rekomendasyon nga ilang gipresenta mao ang istrikto nga pag-ban sa mga pork products ug processed meat nga mosulod dinhi sa dakbayan nga gikan sa mga airports ug seaports.
Subli sab nga gibutyag sa nahisgutan nga daghanan pa ang angayan nga himuon aron nga dili mihatud ug kahadlok ngadto sa publiko ang ASF ingon man dili maka-apekto sa pork industry dinhi sa siyudad.
Una ng gimugna ang ASF Task Force kaniadtong Setyembre 5 pinaagi sa Executive Order 37 diin tumong niini nga ma-protektahan ang siyudad batok sa ASF ingon man magpatuman dinhi sa siyudad ug ASF Protection Program.
