DAVAO CITY – Hugtanong gikondena sa Police Regional Office XI ang ngilngig nga pagpangatake nga hinimuan sa mga terorista ug extremista sa palengke sa Isulan, Sultan Kudarat niadtong adlaw nga sabado nga mibilin ug walo ka mga samaron.
Tungod niini, paspas nga mipagawas ug kamanduan si PRO XI Regional Director Major General Marcelo Morales nga ang tanang mga PNP units sa Region 11 ipahimutang sa full alert status, mag-establisar ug pahugtan ang mga checkpoint sa mga syudad ug munisipalidad sa Davao region, mopakatag ug daghang ihap sa mga foot ug mobile patrols ilabi na sa mga lugar nga daghan ug tawo, ug mas pahugtan pa ang intelligence monitoring ug sharing sa impormasyon tali sa ubang mga units.
Ang PRO XI kauban ang AFP ug uban pang mga law enforcement agencies ang mihimo sa tanan aron mapanalipdan ug mahatagan og seguridad ang katawhan batok sa hulga sa mga dautang elemento diin 24/7 sumala pa sila nga andam aron tubagon ang bisan unsa man nga krimen.
Luyo niini, nanawagan ang kapulisan sa matag lungsuranon nga mamahimong abtik ug mag-binantayon batok sa terorismo ug uban pang matang sa pagpangatake.
Nanawagan usab kini ug pag-ampo alang sa mga biktima alang sa hinanali nilang kaayuhan uban sa paglaom nga sa labing madali nga panahon makab-ot ang hustisya ug masilutan ang mga utok sa pagpamomba.
