DAVAO CITY – Miabot na pasado alas sais kagabii sa ilang pinuy-anan sa Digos ang patay’ng lawas sa usa ka miyembro sa Philippine Drug Enforcement Agency (PDEA) nga patay atol sa ilang gilusad nga operasyon sa Ipil, Zambaoanga Sibugay human nga napusilan kini sa suspek nga nalambigit sa illegal nga droga.
Naila ang biktima nga si agent Jack Roland Bastatas, hamtong ang pangidaron.
Bisan nga nasubo sa gidangatan sa ilang anak, mapasalamaton pa gihapon si Rolando, amahan sa biktima sa suporta nga gihatag kanila sa PDEA ingon man sa mga opisyal sa ahensiya.
Nasayran sab ni Rolando nga napatay sab sa maong operasyon ang tanan nga gikanayong mga durugista nga miyembro sa MILF ug usa sab ka miyembo sa PNP ang samdan.
Narekober sab sumala pa sa otoridad ang tag-as nga mga kalibre sa armas atol sa nahisgutan nga operasyon.
Samtang gikanayon ni PDEA director Gen. Aaron Aquino, nga bisan nakabsan ug kinabuhi ang usa sa ilang mga sakop, dili sila moundang sa ilang mandato ingon man sa kampanyan sa kagamhanan nga gukdon katong mga indibidwal nga nalambigit sa ginadili nga droga.
