DAVAO CITY – Nagpahimangno ang Business Bureau ngadto sa mga tulonghaan sa siyudad nga dili nila i-renew ang business permit sa higayon nga dili ipatuman sa pamunoan niini ang paglakip sa leksiyon sa Drug Education Module for Community-Based Rehabilitation and Aftercare Program.
Kahinumduman nga tumong sa lokal nga panggamhanan nga ma-edukar pa ang mga kabataan kalabot sa dili maayong epekto sa paggamit ug ginadili nga droga ilabi na karon nga sagad mga kabataan ang malambigit niini.
Hinuon una ng gipasalig sa mga pampubliko ug pribadong tulonghaan sa elementarya ug sekondarya sa dakbayan nga andam sila nga motamud sa maong polisiya diin partikular nga tudloan sa maong leksiyon ang mga estudyante sa Grade 4 ngadto na 12.
Una ng gibutyag ni Davao City Anti-Drug Abuse Council (Cadac) technical adviser Donaldo Rivera nga ang Drug Education Module for Community-Based Rehabilitation and Aftercare Program mao ang pagtudlo sa mga estudyante pinaagi sa drug instructional materials ug gamiton kini ngadto sa elementary, secondary, ug tertiary sa tanan nga mga pampubliko ug pribadong tulonghaan sa siyudad.
Gitataw sab ni Rivera nga tanan nga mga pmpublikong tulonghaan ang otomatiko nga magpatuman sa maong module sanglit ilalom kini sa Local School Board (LSB) diin miyembro si Davao City Mayor Sara Duterte-Carpio.
