DAVAO CITY – Pasakahan na ug kaso nga adunay kalabutan sa illegal nga sugal ang pipila ka mga indibidwal nga nasikop sa mga personahe sa Asuncion MPS atol sa gipahigayon nga anti-illegal gambling operation sa Purok – 9, Upper Brgy. Cabaywa, Asuncion, Davao del Norte.
Naila ang mga dinakpan nga sila si Joel Molina Echalas, 51 anyos, minyo, laborer, residente sa Purok 14, Brgy. Cambanogoy, Asuncion, Davao del Norte; Eselyn Dizon Del Rosario, 35 anyos, single, laborer, residente sa Purok 9 upper Brgy. Cabaywa, Asuncion, Davao del Norte; ug Roberto Aranalan Chua, 44 anyos, minyo, laborer, residente sa Purok 4 Brgy. Tiburcia, Kapalong, Davao del Norte.
Aktor nga nasikop ang mga nahisgutan nga nagdula ug illegal card game o mas naila nga “Tong-its” sa terrace sa pinuy-anan sa usa ka Joel Robles sa Purok-9, Upper Barangay Cabaywa, Asuncion, Davao del Norte.
Narekober gikan sa suspek ang playing cards nga ilang gigamit ug kuwarta nga kantidad sa One Hundred Eighty Pesos (Php180.00) isip ilang patad.
Samtang gidayeg sa Police Regional Office (PRO) ang kalampusan sa kapulisan ug gi-awhag ang tanan nga mga police units nga pahugtan ug gukdon kadtong mga illegal gambling violators aron nga protektahan ang mga kabataan ug minor de edad nga posibleng malambigit sa susama nga klase sa sugal sa umaabot nga panahon.
