DAVAO CITY – Laraw karon sa Department of Public Works and Highways (DPWH) ug local government nga mohangyo ug pag-apruba sa city council kalabot sa ipatuman nga road widening ingon man pagpahimutang ug traffic signal lights gikan sa Diversion road paingon sa Toril.
Gikanayong ang DPWH XI ug city government mosulod sa usa ka memorandum of agreement sa maong proyekto nga gahinan ug pundo nga P268.12 million.
Subay sa sugyot nga MOA, ang lokal nga panggamhanan ang motapos sa traffic signalization ingon man modumala, magmentina ug mogasto sa uban pa nga trabaho.
Samtang ang DPWH ang magpatuman sa road widening ug pagtaud sa traffic signalization.
Ang lokal nga panggamhanan sab ang moabaga sa pagpa-repair sa mga madaot sulod sa usa ka tuig human ang turnover ug ayha ang pag-isyu ug certificate of completion sa mosunod pa nga mga katuigan.
Kinahanglan sab sumala pa nga siguruhon sa lokal nga panggamhanan nga dili tugtan ang mga vendors, makililimos, ug uban pa nga magpundo sa area diin nahimutang ang traffic signalization.
Kahinumduman nga napalabang sa unang pagbasa ang maong MOA atol sa gipahigayon nga sesyon sa konseho.
