DAVAO CITY – Gikatakda sumala pa nga ipatuman sa Southern Philippines Medical Center (SPMC), giilang pinakadako nga government hospital sa Mindanao ang pag-ban sa paggamit ug plastics sulod sa hospital.
Kini ang gihimong anunsiyo sa balay tambalanan kagahapong adlawa.
Apan gitino ni SPMC-Public Health Unit adviser Dr. Marocel Celeste-Montillano nga ang nahisgutan nga polisiya wala pa hingpit nga gilagdaan alang sa formal dissemination.
Sa kasamtangan, nakapahigayon na sumala pa ug inisyal nga tigom ang hospital ngadto sa mga nagkadaiyang establisyemento nga anaa sa sulod sa compound aron nga masayod ang mga nahisgutan sa bag-ong polisiya nga ipatuman.
Kinahanglan sumala pa nga ipatuman sa pamunoan ang maong lakang kini gumikan sa nagkataas nga basura nga mahipos sa hospital.
Nasayran nga ang SPMC makatigom ug 1,300 kilograms sa non-biodegradable wastes matag adlaw nga gikan sa kapin sa 5,000 ka mga empleyado ug halos 2,000 bed patients.
Ilalom sa sugyot nga polisiya, tanan nga mga empleyado, pasyente, watchers, ug bisita ang mopailalom sa hugtanon nga inspeksiyon sa higayon nga mosulod sa hospital.
