DAVAO CITY – Gipasalig sa Social Security System (SSS) nga magpadayon ang ilang paggukod sa mga establisyemento nga nakahimo ug kalapasan ug wala mi-remit sa kontribusyon sa ilang mga empleyado.
Kahinumduman nga mukabat sa 14 ka mga balay pamatigayon sa Digos Davao del Sur ang na-isyuhan ug show cause order sa mga personahe sa legal and enforcement group sa Manila ingon man mga personahe sa SSS southern Mindanao.
Tipik lamang kini aron masiguro nga mapahimangnoan nila ang mga employer nga kinahanglan atimanon niini ang ilang obligasyon aron nga dili mapahamtangan ug multa. Pipila sa mga na-isyuhan ug show cause order ang gilangkuban sa mga gasoline station, barberohan, printing press ug daghanan pa.
Una ng nasayran kang Jocelyn Gopo, SSS head Davao del Sur nga gikan sa 3,000 ka mga employers sa lalawigan, kapin 500 niini ang non compliance sa mga polisiya nga gipatuman sa ahensiya.
Nanawagan na lamang ang SSS ngadto sa mga employers nga wala nag-remit ug kontribusyon sa ilang empleyado nga mopailalom sa ilang condonation program nga walay ipahamtang nga multa diin kutob na lamang kini sa Setyembre 6.
