DAVAO CITY – Nakatala ang Philippine National Police Regional Internal Affairs Service (PNP-RIAS) Davao Region unom ka mga sakop sa kapulisan nga napasakahan ug kasong administratibo sulod lamang sa bulan sa Hunyo ning tuig kasamtangan.
Sumala pa kang PNP-RIAS 11 Regional Director Jose Carumba nga ang giduso nga kaso batok sa mga badlungon nga pulis ang non-motu propio.
Dugang sa nahisgutan nga RIAS nagapahigayon ug surprise inspections sa tanan nga presinto sa siyudad.
Gitataw sab sa direktor nga ang RIAS mao ang buhatan nga gitahasan nga mo-imbestiga sa mga kapulisan nga gi-akusahan nga nakalapas sa police procedures and regulations, kini tungod sa mga reklamo nga giduso o pinaagi sa motu propio investigation.
Nasayran sa PNP-IAS nga adunay pagsaka ngadto sa 36 percent ang ihap sa mga reklamo batok sa mga police officers ngadto sa 2,291 sukad Enero hangtud na Mayo ning kasamtangan nga tuig gikan sa 1,683 sa susama nga panahon sa milabay nga tuig.
Samtang padayon ang panawagan karon ni Carumba ngadto sa publiko nga i-report sa ilang buhatan ang mga badlungon nga mga pulis sa bisan asa man nga buhatan sa PNP aron nga mahimuan gilayon kini ug hinanali nga aksiyon.
