DAVAO CITY – Gipanghimakak sa Department of Education (Dep Ed) Eleven nga gipasirhan na nila ang 55 ka mga Salugpungan Tatanu Igkanugon learning centers sa kabukiran sa Region Eleven.
Sumala pa kang Mr. Genelito ‘Dodong’ Atillo, tigpamaba sa Dep Ed Eleven nga sa pagkakaron suspensyon pa lamang ang ilang gipatuman sa nahisgutan nga mga tulonghaan samtang gihatagan pa ug kahigayonan nga makatubag sa mga alegasyon nga nahimo sila nga pronte sa kalihukan sa mga walhon ang nahisgutan nga mga tulonghaan.
Dugang pa ni Mr. Atillo nga posibling dunay lahi nga agenda ang mga militanteng grupo mao nga inay nga tubagon ang mga alegasyon, gikundena na hinoon ang nahimong lakang sa kagamhanan.
Una nang gikondena sa Save Our Schools Foundation ang nahisgutan nga closure sumala pa nga gipatuman sa Dep Ed Eleven.
Gi-awhag sa Dep Ed ang militanteng pundok nga sabton ang mensahe sa Dep Ed. Wala sumala pa mituo ang maong buhatan sa mga alegasyon batok sa Salugpungan Community Learning Centers ug gipa-abot pa nila ang tubag niini.
Timbang-timbangon pa nila ang mamahimong lakang kung makatubag na ang kadumalahan sa Salupungan Schools.
