DAVAO CITY – Gipasalig sa kapulisan sa dakbayan nga pabilin sila nga alerto bisan nga wala nahinayon kagahapong adlawa ang plano unta nga pagpahigayon ug pag-martsa sa mga sakop sa Kabus Padatuon (KAPA) ministry International Incorporated paingon sa pinuy-anan ni Pangulong Rodrigo Duterte aron nga manawagan nga ibalik ang ilang operasyon.
Hinuon gibutyag ni Police Capt. Ma. Theresita Gaspan, tigpamaba sa Davao City Police Office (DCPO) nga wala pa silay nadawat nga impormasyon nga adunay mga miyembro sa KAPA nga nakasulod na dinhi sa dakbayan.
Sa kasamtangan, padayon sumala pa sila nga nakiglambigit sa uban pang law enforcement unit aron nga masiguro nga andam sila kanunay sa higayon nga kalit na lamang nga modagsa ang mga miyembro sa KAPA.
Samtang una ng gibutyag ni Police Major Jason Baria, tigpamaba sa Police Regional Office (PRO) 11, nakakuha sumala pa sila ug impormasyon nga adunay mihangyo nga dili lamang ihinayon ang pag-martsa sa mga sakop sa KAPA paingon sa pinuy-anan ni Pangulong Duterte.
