DAVAO CITY – Nadungagan pa karon ang investment scams sa Davao region ang nakadesisyon nga manirado na lamang diin pipila niini ang gisibat na sa ilang mga investors ang kuwarta. Ulahing nanirado ug gisibat sa ilang mga kadagkuan ang salapi mao ang Enterprise Company o Enco.
Kahinumduman nga midagsa ang mga investors sa Tagum City Police Station human nga wala na nila igkita ang mga opisyales sa nahisgutan nga kompanya nga nahimutang sa Mankilam Tagum City.
Sa impormasyon nga nahipos sa kapulisan, mikabat sa P80,000,000 ang gisibat sa Enco diin wala na nagpakita ang ilang mga opisyales sukad nga gipasirad-an kini kaniadtong milabay nga Hunyo 10 hinungdan nga naminghoy ang mga investors nga naghulat unta sa ilang pay-out.
Gikanayong nanirado na ang kompanya gumikan kay wala nay nag-invest ug dili na matuyok ang kuwarta nga gi-pay in sa mga investors.
Daghan sumala pa na-agni nga mo-invest sa maong kompanya nga nagtanyag ug 300% nga return of investment sulod lamang sa 20 ka adlaw.
Gawas sa nahisgutan nga kompanya, uan na sab nga misibat ang kadagkoan sa QuestLink Digital Marketing diin gidala nila ang P200,000,000 nga investment ingon man ang Titan 29 nga kapin sa P200 milyones sab ang natangag.
Nag-anunsiyo na sab nga manirado ang P7 Beauty and Health Products Marketing apan misaad nga ibalik ang kuwarta sa ilang mga investors samtang temporaryo sab nga gihunong sa Rigen Marketing ang ilang operasyon ug misaad nga asikasohon sab ang pagbalik sa kuwarta sa ilang mga investors.
