DAVAO CITY – Gibutyag ni Davao City Mayor Inday Sara Duterte Carpio nga wala sumala pay kamatuoran ang pahayag ni Rep. Prospero Pichay nga iyang girekomenda si Rep. Martin Romualdez isip Speaker sa House of Representative.
Kung gisaka sumala pa niya ang kamot niini atol sa ilang gipahigayon nga rally sa Tacloban, gihimo lamang niya kini gumikan kay sama ni Rep. Lord Allan Velasco, gisuportahan sumala pa ni Romualdez ang mga agenda ni Pangulong Duterte.
Samtang una na sab nga gibutyag ni Mayor Inday nga wala siyay intensiyon nga dawaton ang rekonsilasyon kaniya ni Rep. Bebot Alvarez gumikan kay nakita niining kulang ug sensiridad ang magbabalaod.
Gikanayong human sumala pa midaug sa milabay nga midterm election si Alvarez, miluwat matud pa kini ug pulong nga “Ipapahiya ko si Sara.”
Samtang dihang gipangutana ang Mayor kalabot sa interes ni Cong-elect Paolo Duterte nga mamahimong speaker sa House of Representatives, mas maayo sumala pa nga ang ilang amahan ang motubag niini ilabi na nga kini ang Pangulo sa nasod ug wala siya sa posisyon aron nga motuboy ug si bisan kinsa man nga indibidwal.
Bisan nga aduna siyay personal napili apan dili sumala pa niya buot nga ma-impluwensiyahan ang kongreso.
Mas maayo sumala pa nga ang mga bag-ong napili nga miyembro sa House of Representatives ang modesisyon sa mga interesado nga mamahimong mosunod nga Speaker basta kay mapatuman niini ang good governance ug adunay positibong kabag-ohan sa kongreso, sa mga pilipino ug sa tibuok nasod.
