DAVAO CITY – Daghanang mga kompanya sa dakbayan sa Davao ang mipailalom na karon sa training sa City Anti-Drug Abuse Council (Cadac) isip pagpangandam sa ipatuman nga lakang diin kadtong mga adunay kapin napulo ka mga empleyado kinahanglan nga magpahigayon ug drug test.
Tumong sab sa maong training nga makamugna ang mga kompanya ug mga lakang o programa aron makalikay ang ilang mga empleyado sa paggamit ug illegal nga droga.
Una ng gibutyag ni Concepcion Domag, Technical adviser sa Davao City Cadac nga ang pagpailalom sa drug test sa mga empleyado ipatuman na sa mosunod nga tuig isip usa sa mga rekisitos aron nga maka-renew ang mga kompanya sa ilang business permit.
Nasayran nga ang gipahigayon nga training nga gitambongan sa mga pribadong sector maoy ika-lima na nga batch sa pagbansay nga gihimo sa ahensiya.
Gitataw sab ni Domag nga sa kasamtangan, mukabat na sa kapin 60 ka mga kompanya ang misalmot sa ilang gipahigayon nga training.
