DAVAO CITY – Gimandoan karon sa Davao City Business Bureau ang pagpahunong sa operasyon sa Regin Marketing nga naa nahimutang sa Purok 43 Luzvimda Village, Maa ning dakbayan sa Dabaw.
Subay sa gihimo nga inspection kagahapong adlawa sa Business Bureau ug sa Anti Scam Unit sa syudad sa Dabaw, nasuta nga nakalapas ang Regin Marketing sa 2017 Revenue Code of Davao city gumikan sa kawad-on ug Business Permit to operate ug Mayors permit.
Ang Regin Marketing nga gi-operate sa usa ka Rico John Garcia, nagsugod lamang sa pag-operate niadtong Abril 22, 2019, apan nakakuha kini og dakong pagtagad sa publiko gumikan sa kadaghan sa mga tawo nga modagsa dinhi matag adlaw.
Gikanayong nalambigit kini sa pyramiding scheme sanglit subay sa testimonya sa mga nag-invest, nakadawat sila og pila ka pilo sa kantidad sa salapi gikan sa gamay lamang nga kapital nga ilang gi-bubo dinhi.
Apan subay sa gideklarang nature of business niini, nalambigit lamang sila sa pagpamaligya og mga wellness product.
Labot niini, gimandoan ang Regin marketing nga makig-kita kang Business Bureau OIC Atty. Marrissa Marasigan-Torentera sulod sa tulo ka adlaw sukad gihimo ang inspection aron hapsayon ang ilang problema.
Sa higayon nga mapakyas sumala pa kini, iduso na ngadto sa buhatan sa City Mayor ang kaso alang sa tukmang legal nga aksyon.
