DAVAO CITY – Midoble sumala pa ang kaso sa dengue sa dakbayan atol sa unang quarter ning tuig kasamtangan kung itandi sa susama nga panahon sa 2018.
Sukad Enero hangtud Marso 2019, nakatala ang City Health Office (CHO) ug 1,681 ka kaso gikan sa 572 cases nga natala sa susama nga panahon sa 2018.
Karung tuiga, ang Toril District adunay pinakataas nga ihap sa kaso nga anaa sa 240, gisundan sa Buhangin District nga adunay 235, Talomo South District nga adunay 185, Talomo Central District nga adunay 175 ug Agdao District nga adunay 122 ka kaso.
Sa milabay nga tuig, ang Buhangin adunay pinakataas nga ihap sa dengue cases nga anaa sa 81, gisundan sa Talomo North nga adunay 71 ka kaso.
Samtang sa milabay nga Abril 13, nakatala na sila ug 1,762 ka kaso dinhi sa dakbayan.
Gitataw ni CHO technical division chief Doctor Julinda Acosta nga makaalarma ang pagsaka sa kaso sa dengue.
Usa sumala pa sa mga hinungdan niini mao ang napundo nga tubig gikan sa mga ulan.
Gibutyag sa health officer nga ang pag-ubos sa dengue cases magsugod sa balay hinungdan nga gi-awhag niini ang mga opisyal sa Barangay nga awhagon ang ilang komunidad nga mohimo ug mga lakang sama sa pagpanglimpiyo sa palibot.
