DAVAO CITY – Hingpit na nga gi-ablihan sa lokal nga panggamhanan inabagan sa Department of Health (DOH) XI ang duruha ka mga bag-o nga Botika ng Bayan outlets aron nga maakomodar ang medisina nga gikinahanglan alang sa mga Dabawenyos.
Gikanayong ang bag-ong Botika ng Bayan outlets nahimutang sa District Health Centers sa Toril ug Bunawan diin mohatag kini ug libre ingon man accesible medicines alang sa mga kabus nga residente.
Nasayran nga sa kinatibuk-an, aduna nay pito ka mga Botika ng Bayan dinhi sa siyudad.
Pipila sa nahisgutan nga botika ang nahimutang sa Lingap Center sa Southern Philippines Medical Center, City Health Office, ug Calinan, Toril ug Bunawan District Health Centers.
Sumala pa kang Dr. Josephine Villafuerte, head sa City Health Office (CHO), nga tumong sumala pa sa lokal nga panggamhanan nga magtukod pa ug daghanang Botika ng Bayan outlets sa uban nga mga distrito.
Gitataw sa opisyal nga ang mag pasyente mamahimong moadto lamang sa Botika ng Bayan, i-presenta ang ilang prescriptions ug mamahimo na nga makuha niini ang mga tambal nga walay bayaran bisan usa ka centavo.
Subay sa kasabutan tali sa siyudad, ang DOH maoy manguna sa stocks sa Botika ng Bayan sulod sa tulo ka tuig. Human ang nahisgutan nga panahon, anaa na sa lokal nga panggamhan ang responsabilidad sa stocks sa mga tambal.
Kahinumduman nga ang panglawas ang usa sa 10 nga priority agenda ni Mayor Inday Sara Duterte.
