Gipahimangnoan sa usa ka opisyal sa Davao City Overland Transport Terminal (DCOTT) ang mga out-of-town commuters nga dili maghulat ug mga bus daplin sa mga Highways inay modiretso na lamang sa mga terminals aron nga malikayan ang pagkalangan sa biyahe karong panahon sa semana santa.
Gumikan sab sa kadaghanan sa mga pasahero, mamahimong lisud na sab sa mga commuters nga anaa daplin sa kadalanan nga makasakay sanglit puno na kini kung mogawas sa terminal.
Kung mosakay lamang sa mga terminal, masiguro sab sumala pa ang seguridad sa mga pasahero ilabi na nagpatuman karon ug hugtanon nga inspeksiyon ang DCOTT ug uban pang transport terminal.
Gawas niini, adunay nakamuntar nga 31 ka mga CCTV camera sa bus terminal ingon man duruha ka mga body scanners. Gipamutang sab sa terminal ang walkthrough segment nga alang sa mga Persons with Disabilities (PWDs), buntis, senior citizens ug mga babaye nga nagdala ug bata.
Una na sab nga gibutyag ni Davao city Police Office (DCPO) Director Police Col. Alexander Tagum nga dili nila tugutan nga mag-break, day off o mag-leave ang kapulisan gumikan kay gipatuman nila karon ang full alert status dungan sa pagpahinumdom sa Holy week.
