DAVAO CITY – Gipasalig sa kasundalohan nga magpadayon ang ilang mga programa nga motabang sa mga kanhi miyembro sa New People’s Army (NPA).
Una niini gipasigarbo ni Lt. Col. Jerry Lamosao, tigpamaba sa 10th Infantry Division (ID) nga mukabat sa 99 regular nga miyembro sa NPA ang misurender sa ilang Area of Responsibility (AOR) sa unang quarter ning tuig kasamtangan.
Kalakip sab sumala pa sa mga mibalik sa sabakan sa kagamhanan ang 73 ka mga militia ng Bayan, 23 ka mga sakop sa Sangay ng Partido ng lokalidad, 93 ka mga under ground mass organizations ug 10 ka mga left leaning organizations ang misurender.
Gitataw sab ni Lt. Col Lamosao nga mukabat sab sa 45 ka mga high powered firearms ug 21 ka mga lowered firearms ang ilang nakumpiska samtang 13 ka mga kampo sa mga rebelde ang ilang nakubkoban.
Sa gipahigayon nga mga operasyon sa militar atol sa first quarter, mukabat sab sa upat ka mga NPA ang ilang napatay.
