DAVAO CITY – Gipasalig sa tropa sa kasundalohan ingon man sa kapulisan nga hugtanon ang ilang gipatuman nga pagbantay sa mga checkpoint nga pasulod ug paggawas sa dakbayan aron masiguro nga walay spill over sa nahitabong pagpamomba sa Isulan Sultan Kudarat diin duruha ang natalang patay samtang ubay-ubay ang nanga-agol.
Matud pa kang Capt. Jerry Lamosao, tigpamaba sa 10th Infantry Division (ID), nga doble ang ilang gihimo karon nga inspeksiyon aron lamang masiguro nga dili makasulod sa dakbayan ang mga dautan nga elemento nga planong molusad ug kagubot.
Mihangyo lamang sila sa mga motorista nga makig-kooperar kanila ilabi na nga alang lamang sa kaayohan sa tanan ang ilang gihimo.
Gihimo sab sumala pa karon sa otoridad ang istrikto nga paghiling sa mga butang ilabi na nga nagsingabot na sab ang paghinumdom sa Roxas Night Market bombing nga mikalas ug daghanang kinabuhi.
