DAVAO CITY – Lima ka mga tawo misuse sa chop-chop nga lawas sa usa ka babaye sa Angel Funeral Homes.
Kini ang gipadangat nga impormasyon sa Buhangin Police Station uban sa pagkanayon nga lima ka mga pamilya ang midangop sa ilang buhatan ug nagpakuyog sa Angel Funeral Homes sa dalang Torres sa pamasin nga mao kini ang ilang natigwala-an nga kabanay.
Sumala pa kang Buhangin Police Station Chief PCI Jack Leon Tilcag nga kagahapon nahimo sab sila nga okopado gumikan kay duha ka mga pamilya ang namasin nga ilang ang wala pa maila nga patay.
Una niini mao ang pamilya nga taga-Tamugan kang kinsang kabanay natigwala-an niadto pang Enero, apan sa pagsusi nila sa punerarya dili kini mao ang ilang gipangita nga kabanay.
Sunod nga midangop sa Buhangin Police Station ang usa ka Damian Navarro, Jr., diin natigwala-an sab niini ang iyang apo nga si Ponie Navarro nga laraw unta nga mag-abroad nga nawala sukad pa niadtong bulan sa Hunyo.
Sumala pa kang PCI Tilcag nga nagtuo sila nga mao na gayud kadto ang kabanay gumikan kay pursegido si Navarro nga mao na kadto ang iyang natigwala-an nga apo.
Sa pagseguro gidala ni Tilcag ang uban nga mga silingan sa funeraria aron nga ipatan-aw ang patay nga lawas.
Ang mga silingan ni Navarro namahayag nga dili kadto mao mang apo sa tigulang.
Sumala sa mga silingan nga wala’y mga timailhan nga mao kadto ang biktima.
Gikompirma ni Telcag nga daghanan na sab nga mga taga-lalawigan ang mitawag sa ilang buhatan ug nagpakisayud labot sa chop-chop nga patay nga lawas sa babaye.
Hangtud sa pagkakaron blangko pa gihapon ang kapolisan labot sa identity sa gitagod-tagod nga patay nga lawas sa biktima ug kung kinsa ang responsabli sa nahisgutan nga krimin.
