DAVAO CITY – Patay ang usa ka motorista human ang nahitabong bangga tali sa usa ka police patrol car sa Mabini sa Compostela Valley Province.
Naila ang biktima nga usa ka Leonardo Eliguer, 38-anyos, residente sa nahisgutang lugar ug driver sa motor. Sa imbestigasyon sa mga otoridad, nasayran nga alas 4:15 sa hapon kagahapon sa dihang biyahe padulong dinhi sa dakbayan sa Davao ang police patrol vehicle nga gimanehi ni PO1 Mark Anthony Varron Pableo, 30-anyos sakay ang tulo pa ka mga pulis nga sila PCI Lino Akiangan Jr., PO1 Alvenar Ventura ug PO1 Louie Bacunlay.
Apan pag-abot sa Purok 7, Lapinigan, Brgy. Cadunan, Mabini sa maong probinsya, kalit na lamang nga mibangga sa atubangan sa patrol car ang motor nga gimaneho ni Eliguer gikan sa Mati City.
Tungod sa kakusog sa dagan sa motor, misungag kini sa patrol car rason nga nalagpot ang driver. Nakaangkon ug grabeng samad ang biktima nga gidala pa sa Davao Regional Medical Center sa Tagum City, Davao del Norte apan gideklara na kining dead on arrival sa mga doktor. Sa karon, anaa na sa kustudiya sa Mabini Police Station ang driver nga si PO1 Mark Anthony Varron Pablo, ug ang patrol car.
