DAVAO CITY – Pinangita na karon sa kapolisan sa Santa Ana Police Station ang mga nangawat ug steel plate sa usa ka machine shop sa Vinson St., Barrio Obrero, Barangay Paciano Banggoy, ning dakbayan sa Davao.
Nakuha-an ug footage sa CCTV ang panghitabo apan dili klaro ang panagway sa kawatan.
Apan sumala pa kang Police Senior Inspector Michael Uyanguren, hepe sa Sta. Ana Police daku gihapon ang matabang ang footage sa CCTV aron nga dali nga madakpan ang mga responsable sa krimen.
Sa CCTV footage makita nga usa ka lalaki nga nagkalo ang midoul gawas sa machine shop ug gilangkat ang steel plate.
Pipila ka Segundo ang nakalabay laing lalaki na sab ang midoul ug mitabang ug dayong sa gikawat nga steel plate.
Nasayran gikan kang Jun Allawan nga mao ang tag-iya sa Machine Shop kapin duha ka libo ka pesos ang bili sa nakawat nga steel plate.
Nasayran nga halinon ang steel plate gumikan kay ginagamit kini sa paghimo ug bearing sa mga industrial machine. Gumikan sa hitabo natagam na sila ug dili na magbilin ug gamit gawas sa ilang machine shop.
