DAVAO CITY – Wala nahimong problema alang sa mga dagkong opisyal sa Davao Occidental ang pagpailalom nila sa drug test kini aron nga ipakita ang ilang dakong suporta sa kampanya ni Pangulong Rodrigo Duterte batok sa paggamit ug ginadili nga droga.
Kahinumduman nga mismong si Governor Claude Bautista ug igsuon niining si Bise Gobernador Franklin Bautista ang nangunay sa pagpailalom sa drug test nga gipahigayon atol sa Provincial Peace and Order Council meeting.
Gawas sa mga nahisgutan, mipailalom sab sa susama nga proseso ang mga miyembro sa Sangguniang Panlalawigan, lima ka mga mayor sa mga munisipyo sa Malita, Sta. Maria, Don Marcelino, Jose Abad Santos ug Sarangani.
Nagtuo ang mga opisyal nga angaya’ng magsilbi sila nga ehemplo sa katawhan aron nga magmalampuson sab ang kampanya batok illegal drugs sa kasamtangang administrasyon.
Kalakip sab sa mipailalom ang mismong mga sakop sa Provincial Anti Drug Abuse Council (Padac) ug Provincial Peace Peace and Order Council ingon man tanan nga mga department heads sa kapitolyo.
Kalakip sab sa mipakita ug suporta sa maong lakang ang mga bag-ong napili nga Sangguniang Kabataan ug opisyal sa barangay nga susama usab nga mipailalom sa drug test.
