DAVAO CITY – Gibasura sa Department of Interior and Local Government (DILG) XI ang ideya nga armasan ang barangay officials aron masulbad ang insurhensiya ug kriminalidad.
Kini ang pahayag ni DILG regional director for Davao Region Alex C. Roldan human ang naunang pahayag ni Pangulong Rodrigo Duterte nga hatagan ug armas ang tanan nga mga Barangay Kapitan.
Matud pa kang Roldan nga dili solusyon ang maong lakang ug aduna sumala pay mga otoridad ug armed forces nga maoy makasulbad sa insurhensiya.
Nagtuo sab ang opisyal nga kung molihok ang tanan nga mga hingtungan nga ahensiya sa kagamhanan, masolusyonan sumala pa ang mga nag-unang suliran sa katilingban sama sa kriminalidad. Una ng gibutyag ni Pangulong Duterte nga buot niya nga isyuhan ug mga shotguns ug dili mga high powered firearms ang mga Barangay Kapitan samtang caliber 22 o Beretta alang sa mga barangay tanods ilabi na kadtong mipailalom sa training sa ROTC; ingon man sa retired military ug police officials.
Apan gikanayon ni Col. Nolasco Mempin, commander sa Task Force Davao (TFD) nga kung unsa man ang mamahimong desisyon kalabot sa pag-armas sa mga Barangay officilas andam sumala pa sila nga motamud niini.
