DAVAO CITY – Nakahi-agum sa bug-at nga desiplina ang usa ka PO1 sa Davao City Police Office (DCPO) nga migamit sa social media aron nga yaga-yaga-an ang kasamtangan nga Police Director Gen. Oscar Albayalde.

Nasayran sa Bombo Radyo Davao nga gikompirma mismo ni DCPO Spokesperson PSI Maria Teresita Plaza Gaspan nga tua na sa ARMM madistino ang gipitol nga pulis.

Maisip nga usa ka matang sa kakulang sa pagtahud ang binuhatan sa nahisgutan nga pulis batok ngadto sa iyang labaw nga opesyal.

Duna na sa’y unang mga pulis nga gipangtaktak sa distino human mihimo sa sama nga pagyagayaga sa ilang Police Director General.

Gilauman nga ang nahi-aguman nga pagpitol sa mga natungdan mamahimong panig-ingnan sa kapolisan sa dakbayan ug sa tibuok rehiyon.

Nakompirma nga sangkap sa monitoring ang social media nga ginagamit sa mga sakop sa kapolisan sa nasod ug diha-diha dayon ipatagamtam ang pagdesiplina batok ngadto sa mga masinupakon sa gipatuman nga mga sumbanan.