DAVAO CITY – Gikumpirma sa Presidential son Paolo Duterte nga ang iyang anak ug asawa ang natuplokan sa kontrobersiyal nga Dengvaxia vaccine kaniadtong 2016.
Matud pa sa kanhi Bise Alkalde nga ang asawa niini nga si January Duterte ug ang anak nga si Sabina ang natuplokan sa nahisgutan nga bakuna sa usa ka private clinic.
Gibutyag ni Pulong nga sa nahisgutan nga panahon, nagtuo siya nga epektibo ang bakuna hinungdan nga nagpabakuna ang iyang pamilya niini.
Dugang ni Paolo nga ang iyang anak nga si Uno ang bata pa kaniadto hinungdan nga wala pa niya kini napabakunahan. Bugtong mahimo lamang sumala pa karon ni Paolo nga masigurong maprotektahan ang iyang asawa ug anak sa pagpaak sa lamok.
Matud pa kang Duterte nga kung adunay dautan nga mahitabo sa iyang asawa ug anak, wala sumala pay angayan nga basulon kung dili ang kanhi Aquino administration.
Kahinumduman nga una ng gikumpirma ni Special Assistant to the President Christopher “Bong” Go nga nabakunahan sab si Kitty nga anak nila ni Pangulong Rodrigo Duterte ug Honeylet Avanceña.
