DAVAO CITY – Gilauman sa usa ka progresibong grupo nga mapatuman ang Election Reform Act panahon sa Barangay ug SK Elections.
Nasayran nga naumol ang nahisgutan nga balaod aron nga panalipdan ang katungod sa mga magtutudlo nga mangalagad sa piliay karong Mayo 14.
Sumala pa kang Wilfredo Lacatan, Vice President sa Alliance of Concerned Teachers (ACT) sa Davao Region boluntaryo ang pagserbisyo sa eleksyon nga nagkahulogan nga dili sila mapugos sa mga eskwelahan aron nga mangalagad isip mga poll inspectors.
Dugang pa ni Lacatan nga pinasikad sa gimbut-an sa balaod kinahanglan nga mo-abot sa P6,000 ang honorarium alang sa Electoral Board Chairman, P5,000 alang sa Electoral Board Members, P4,000 alang sa Department of Education Supervisor Officials, P1,000 alang sa Support Staff, ug P1,000 alang sa travel allowance.
Gitataw sab ni Lacatan nga kinahanglan nga dunay lima ka adlaw nga minimum service credit ang mga magtutudlo, dosentos mil ka pesos nga medical assistance, singkwenta mil ka pesos nga legal indentification package, ug kinyentos mil ka pesos nga death benefit.
