DAVAO CITY – Hugtanon nga gipahimangno-an sa Police Regional Office (PRO) eleven sa pagpanguna ni Police Chief Inspector Manuel Gaerlan ang mga Station Commander sa rehiyon nga i-monitor ang emosyon sa ilang mga ginsakpan.
Kini human sa dautan nga gidangatan ni SPO1 Roger Cabardo Padayogdog nga napatay sa mga sakop sa Regional Mobile Force Battalion human nga naghuramintado ug girakrakan ang patrol car sa kapolisan sa gawas nga bahin sa Camp Captain Quintin Merecido o Camp Catitipan pasado alas 6:00 kagabii.
Sumala pa kang Gaerlan nga una pa ang panghitabo una na nga namatikdan nga daw dunay gihambin nga suliran ang pulis hinongdan nga labihan ka iritabli.
Pelegroso gayud ang trabaho sa police ug angay nga mopailalum gilayon sa counseling ang mga police nga problemado aron nga kalikayan ang pagkapotong ug paghuramintado.
Gitataw ni Gaerlan nga wala’y kalabotan sa bag-o intrikto nga sumbanan sa bag-o nga PNP Chief ang pagka-usab sa pamatasan ni Padayogdog.
Milusad na ug imbestigasyon ang PRO eleven kung unsa ang nahimong hinongdan sa emotional stress sa napatay nga police, kinsa dunay asawa ug bata pa ang mga anak.
