DAVAO CITY – Plano nga ipatuman sa lokal nga panggamhanan ang No Contact Apprehension (NCA) program sa Land Transportation Office (LTO).
Ang NCA usa ka polisiya nga mogamit ug CCTV, digital cameras ug uban pang gadget o technology aron nga makakuha ug video ug hulagway aron nga pangsikupon ang mga malapason sa traffic laws, rules and regulations.
Sa kasamtangan gihisgutan pa sa City Council ang sugyot balaudnon nga magtugot kang Mayor Sara Duterte-Carpio nga sudlon ang memorandum of agreement (MOA) tali sa LTO.
Kahinumduman nga giduso ni Konsehal Melchor Quitain Jr. chairman sa committee on rules, laws, ordinances, and privileges, ang maong sugyot nga napalabang na sa unang pagbasa.
Ipailalom sumala pa kini sa public hearing ilalom sa komitiba ni Quitain uban ang committee on transportation and communication nga ilalom usab ni Conrado Baluran.
Sa nahisgutan nga programa, kinahanglan adunay interconnect ang apprehension database sa lokal nga panggamhanan ug Information System (LTO IT system) sa Motor Vehicle Registration System ug sa Driver’s Licensing System aron nga masiguro nga epektibo ang traffic apprehension enforcement.
Ilalom sa MOA, ang dakbayan kinahanglan nga mosuporta sa LTO pinaagi sa paghatag ug local traffic violation information, mo-assist sa pagpalambo sa traffic systems, mo-assist sa pagpatuman sa road safety rules and regulations, ug mosuporta sa kampanya batok sa illegal nga paggamit ug motor vehicles (MV) lakip na ang colorum nga mga sakyanan, car theft, illegal nga pag-import ug uban pang mga lakang nga supak sa paggamit ug MVs.
