DAVAO CITY – Gisaway sa kasundalohan sa kagamhanan ang binuhatan sa mga rebeldeng New People’s Army (NPA) nga mao ang pagrecruit ug paggamit sa mga menor de edad alang sa pagpakiggubat sa tropa sa kagamhanan.
Mismong si Lt. Gen. Benjamin Madrigal Jr., commander sa Eastern Mindanao Command ang mimakmak sa mga rebelde, labi na nga kalakip sa ilang gipangrecruit ang mga menor de edad nga mga kababayen-an.
Pinakaulahi nga napatay sa kasundalohan ang kinse anyos nga NPA sa Sta. Cruz, Davao del Sur, diin naila ang biktima nga usa ka Ronde Ondoc, 15 anyos, residente sa Sitio Tombo, Old Bulatocan, Makilala, North Cotabato.
Atol sa panagsangka nadakpan sab ang usa ka Jessa Lumana nga sakop sab sa NPA ug nabilanggo karon sa Sta. Cruz Municipal Police Station.
