DAVAO CITY – Milusad ug protesta ang halos 90 porsiento sa mga driver sa Krizhia Taxi atubangan mismo sa ilang opisina sa may Bangkal ning syudad, aron ipakita ang hugot nilang pagsupak sa P200 nga usbaw sa arkila sa ilang mga taxi units.
Sa pakighinabi sa Bombo Radyo gikanayon ni Banjo Dayot usa sa taxi driver sa Krizhia nga bug-at ra kaayo ang dos sientos pesos nga usbaw sa arkila sa ilang gi-drivan nga taxi units ilabi na karong panahuna nga minus na kaayo ang ilang mga pasahero human gipatuman ang pag-calibrate sa ilang metrohan.
Gikan 1,140 pesos nahimo nang 1,340 pesos ang ilang arkila sa taxi units nga ilang drivan sulod sa 24 oras. Tungod niini, naa na lamang sa 700-800 pesos ang ilang mauli alang sa ilang pamilya.
Ang usbaw sa arkila ang nanukad sa pagbutang ug dashboard camera ug cellphone units sa mga taxi subay na usab sa gipatumang local application nga Herna.
Apan gikatarungan sa mga taxi drivers nga angayang dili ipasa ngadto kanila ang dugang gasto sa mga taxi operators nga pagpamalit sa nahisgutang mga gadgets sanglit alang man kini sa ilang negosyo.
Plano sumala pa sa nahisgutang mga taxi drivers nga molusad ug protesta sulod sa lima ka adlaw hangtud tubagon sa management sa Kriizhia taxi ang ilang mga ulo. Gisulayan sa Bombo radyo nga makuha ang kabahin sa management sa Krizhia taxi, apan milikay kini.
