DAVAO CITY – Gipamugos ni Davao City Police office director Police Sr. Supt. Alexander Tagum nga walay tulubagon sa balaud si PO2 Alsibar Jama Ismael nga na-assigned sa Calinan Police Station luyo sa pagpa-boto niini ug armas.
Gikatarungan ni Tagum nga walay nibarug nga complainant ug testigo aron pormal nga mapasaka ang kaso batok kang Ismael.
Atol sumala pa sa gihimong imbestigasyon sa kapulisan, bisan ang asawa ni PO2 Ismael nga usa usab ka Police si PO3 Joyce Corsino ang midepensa sa iyang bana ug gipamugos nga usa lamang ka aksidente ang nahitabong pag-boto sa armas sa iyang bana.
Dugang pa ni Tagum nga gumikan sa pag-inilugay ug armas sa magtiayong police wala tuyua nga nakablit ni PO2 Ismael ang gatilyo sa iyang issued firearm nga usaka Glock 17 9mm pistol niadtong Marso 7, 2018 alas 10:45 sa buntag sulod mismo sa ilang pinoy-anan sa Brgy Mintal ning syudad.
Sa pikas bahin, gibarugan ni Tagum nga usaka maayong sakop sa kapulisan si PO2 Ismael.
Gani usa kini sa mga top operative sa Calinan Police station kansa kugi nga nagpatrolya aron lamang masiguro nga luwas ang katawhan sa syudad.
Hinuon, gipasalig ni Tagum nga iyang silutan kadtong mga abusado nga police sa higayong makahimo ug mga kasaypanan.
