DAVAO CITY – Libo-an ka mga application forms ang nadawat sa lokal nga kagamhanan sa dakbayan sa Dabaw gikan sa mga sayong aplikante alang sa naka-schedule nga Passport on Wheels service nga ipahigayon sa Almendras Gym karong Marso 16-17, 2018.
Sumala kang Mary Resma sa City Administrators office, gisubmitar sa mga aplikante ang ilang mga photo copies sa ilang mga gikinahanglanong dokumento alang sa passport application ug renewal.
Ang nahisgutang mga dokumento ang ipadala pa ngadto sa buhatan sa DFA alang sa verification purposes.
Dugang pa ni Resma nga wala nay dawaton pang walk-in applicants atol sa pagpahigayon sa passport on wheels human naka-submiter na ug una-una ang mga aplikante sa ilang mga documentary requirements.
Samtang, atol sa scheduled date sa appointment, kinahanglan nga dad-on sa mga aplikante ang ilang fully-accomplished application forms, ang required original documents, P1,200 alang sa passport fee, ug lain pang P150 isip courier fee.
Samtang, dugang P350 nga kolektahon alang niadtong mga nawad-an ug na-expired na nga mga passports.
