DAVAO CITY – Duruha ka bulan human nga nahitabo ang sunog sa NCCC Mall Ma-a, wala pay nadawat si Davao City Mayor Sara Duterte-Carpio nga report kalabot sa resulta sa final investigation nga gipahigayon sa inter-agency task force.
Buot sa Mayor nga masayran ang resulta aron nga masayod ang kagamhanan kung unsa ang mga angayan nga himuon aron nga malikayan ang susama nga insidente.
Hinuon gibutyag sa Mayor nga dili siya mobabag sa mall owner nga motukod ug lain nga gambalay sa maong area.
Gihimo sa Mayor ang pahayag human nga gipahibalo siya sa Office of the City Building Official (Ocbo) nga gi-aprubahan na ang demolition order sa gambalay.
Gitataw sab ni Duterte-Carpio nga nakiglambigit na sab sila sa Philippine Economic and Zone Authority (Peza), nga nagsuspende sa SSI ug NCCC isip company locator ug economic zone developer human ang nahitabong sunog.
Gitino sa opisyal nga gihulat nila ang resulta gumikan kay ilalom kini sa Peza nga maoy nagpagula ug nagkadaiyang set sa rekisitos.
Kinahanglan sumala pa nga nga makig-reconcile ang lokal nga panggamhanan sa mga nahisgutan gumikan kay kini ang regulating agency ug dili ang siyudad.
