DAVAO CITY – Hugtanong gipanghimakak ni Konsehal Elias Lopez nga nangilkil siya ug negosyante gumikan kay nagtarong sumala pa siya sa iyang katungdanan sukad nga nahimong usa sa mga piniling opisyal sa siyudad.
Tipik lamang ang pahayag sa opisyal human nga una ng migula ang impormasyon nga taga-ikatulong distrito ning siyudad ang gikanayong nangayo ug salapi sa usa ka negosyante aron nga ma-release ang business permit niini sa quarry.
Una ng gipatawag ni Vice Mayor Bernard Al-ag si Lopez gumikan kay kini ang naghupot sa Committee on Housing Rural and Urban Development sanglit anaa sumala pa sa iyang komitiba ang lima ka mga pending permits sa quarry.
Gitataw sab ni Lopez nga angayan sumala pa nga hisgutan ang maong isyu kauban ang uban pa nga komitiba nga agi-an sa mga mokuha ug business permit sama na lamang sa committee on finance, environment ug peace and order.
Hugtanong gipamahayag sab sa opisyal nga sukad nga milingkod siya sa katungdanan, wala siya nalambigit sa mga dili maayong binuhatan.
Samtang gibutyag ni Vice Mayor Al-ag nga sa kasamtangan, wala pay miduol nga negosyante nga miduol sa iyang buhatan kalabor sa maong isyu apan luyo niini mihimo na sila ug lakang aron nga imbestigahan ang nahisgutan nga alegasyon
