DAVAO CITY – Laraw sa konseho ning siyudad nga amyendahan ang sugyot nga anti-discrimination ordinance sa siyudad pinaagi sa pagdugang ug probisyon nga magdili sa mga kompanya nga balibaran ang mga job applicants gumikan sa ilang health status.
Kahinumduman nga ang nahisgutan nga sugyot gipaluyohan ni Konsehal Mary Joselle Villafuerte, chair sa committee on health sa City Council.
Nasayran nga usa ka kalapasan sa anti-discrimination ordinance ang pagbalibad sa mga aplikante gumikan sa iyang ethnic origin, religious affiliation o tinuhoan, gender identity, sexual orientation ug daghanan pa.
Buot ni Villafuerte nga idugang sa maong ordinansa ang health status ilabi na nga limitado lamang kini dihang napalabang kaniadtong tuig 2012.
Nasayran nga ang sakit sama sa Hepatitis B dili sumala pa dali nga makatakod dili sama sa uban nga diseases.
Ang Hepatitis B makatakod lamang pinaagi sa vertical transmission sama sa buntis nga inahan ngadto sa iyang gisabal, parenteral transmission (pinaagi sa dugo o paggamit ug usa lamang ka dagom), sexual, ug inapparent parenteral (pinaagi sa unhygienic tattoo ug piercings).
Bisan tuod nga mahinungdanon ang screening sa Hepatitis B gumikan sa health reasons, dili sumala pa kini angayan nga kabalak-an sa higayon nga adunay mga tawo nga infected sa maong sakit apan buot nga manarbaho.
Samtang wala pa napalabang ang pag-amyenda sa ordinansa, nanawagan si Konsehal Villafuerte sa mga employers nga dili i-discriminate ang mga empleyado nga nagpositibo sa Hepatitis B.
