DAVAO CITY – Gipahimangnoan ang mga residente dinhi sa dakbayan nga mangandam sa mga posibleng pagbaha nga susama sa gihatud sa pag-igo sa Tropical Storm Vinta kaniadtong bulan sa Disyembre sa milabay nga tuig.
Pipila sa mga lugar nga gipahimangnoan sa Pag-asa ang gilangkuban sa Visayas, Caraga, Northern Mindanao, Zamboanga Peninsula ug mga probinsiya sa Davao del Norte, Davao del Sur, Davao Oriental Compostela Valley, North Cotabato, Maguindanao ug Lanao del Sur nga laomang makasinate ug grabe nga mga pag-ulan.
Gipahimangnoan na sab sa lokal nga paggamhanan ang tanan nga mga barangay disaster response units ang mga nanimuyo sa danger zones nga mangandam ug moadto gilayon sa mga preemptive evacuations kung gikinahanglan.
Una ng gisuspende sa Davao Coast Guard Station ang tanan nga mga island hopping trips palibut sa Island Garden City sa Samal.
