DAVAO CITY – Subling gitino sa National Food Authority (NFA)-Davao nga bastante ang supply sa NFA rice apan kinahanglan lamang nila nga limitahan ang volume sa pag-distribute niini ngadto sa mga retailers.
Gipasabot sa ahensiya nga kinahanglan nila nga himuon ang maong lakang aron nga masiguro nga adunay supply sa higayon nga adunay mo-igo nga kalamidad ingon man panahon sa emerhensiya.
Segun ni NFA-Davao manager Edegary Roncal nga gipatuman nila ang pag-limita sa distribution kay nagsugod na ang harvest season ug adunay igong kapili-an ang mga konsumante.
Tipik lamang ang pahayag sa NFA human nga daghanang mga retailers ang mireklamo gumikan kay gilimitahan ang sako nga ihatag kanila diin gikan sa 150 nahimo na lamang kining 40 ka sako sa matag retailer.
Gibutyag ni Roncal nga normal lamang ang 200,000 bags inventory diin ila kini nga imentina aron nga pabiling bastante ang supply.
Samtang laoman sumala pa nga moabot karung adlawa ang barko nga gikan sa Thailand nga nagkarga ug 50,000 ka sako sa imported rice.
Nasayran sa NFA-Davao nga aduna na silay 200 ka mga accredited retailers dinhi sa rehiyon.
