DAVAO CITY – Nagpabilin sumala pa nga aktibo ang kapulisan sa Davao region aron masiguro nga dili maka-atraka ang mga dautang elemento sama na lamang sa mga sakop sa New People’s Army (NPA).
Kini ang gibutyag ni Police Chief Inspector Andrea dela Cerna ang tigpamaba sa Police Regional Office (PRO) 11.
Sumala sa nahisgutan, hugtanon ang pahimangno ngadto sa tanan nga mga unit commanders sa kapulisan nga kinahanglan alerto ug magbinantayon kini kanunay.
Sa kasamtangan, pabilin sumala pa nga malinawon ang Davao region apan dili pa gihapon mukompiyansa ang mga kapulisan.
Gipasalig sab sa kapulisan nga nagpatuman sila ug mas hugtanon nga seguridad ilabi na sa mga lugar sa dakbayan nga posibleng agi-an sa mga dautang elemento.
Nanawagan na lamang si dela Cerna sa publiko nga kanunay nga makiglambigit sa otoridad ug ipahibalo gilayon kung adunay mamatikdan nga katahapan sa palibut.
