DAVAO CITY – Kapin 500 ka mga stakeholders ang laoman nga mosalmut sa Crime Prevention Summit sa Oktubre 2 sa usa ka hotel ning siyudad.
Tumong sa maong tigom nga mapahibalo ang publiko ug mohangyo ug suporta gikan sa komunidad aron nga mas epektibo ang pagbatok sa kriminalidad dinhi sa siyudad.
Una ng gibutyag ni Davao City Police Office (DCPO) director Alexander Tagum nga isip kabahin sa Anti-Crime Prevention Month, mohimo sila ug mga inisyatibo aron nga masayran pa sa publiko ang kalabot crime statistics dinhi sa siyudad.
Nasayran sab kang Tagum nga target na sab karon sa mga kriminal ang mga pribadong subdivision human nga nagmalampuson ang kapulisan sa pagpatuman sa Oplan Iron City o Integrated Revitalized Operation of Neighborhood Watch of the Mega City nga miresulta sa pag-ubos sa ihap sa mga natalang krimen ilabi na sa mga kadalanan.
Hisgutan sab sa maong tigom ang mga nagkadaiyang modus operandi sa mga kriminal ingon man paghatag ug techniques aron dili ma-ilad sa mga kriminal.
