DAVAO CITY – Anaa sa 600 ka mga nagkadaiyang tribu ang laoman nga magtapok sa ipahigayon nga 7th Mindanao Indigenous Peoples Convention sa Agosto 29 hangtud 31 sa usa ka Resort Complex sa Matina ning dakbayan sa Davao aron nga momugna ug hiniusang baruganan aron nga depensahan ang ilang katungod sa bag-ong sistema sa panggamhanan.
Sumala kang chairperson Datu Joel Unad makatabang ang maong convention sa ilang mga katungod partikular na sa ilang mga yutang kabilin ilabi na kung mahinayon ang pagpatuman sa Pederalismo ilalom sa administrasyon ni Pangulong Rodrigo Duterte.
Tumong sab sa maong aktibidad nga mare-assess ang programa sa gobyerno alang sa mga lumad ilabi na ang pagpatuman sa kalinaw, seguridad, agriculture, development, culture, edukasyon ug daghanan pa.
Mamahimong kabahin sa convention ang National Commission on Indigenous People, Mindanao Development Authority, Office of the Presidential Peace Adviser on Peace Process, Department of Agriculture, ug Department of Environment and Natural Resources.
Kalakip sab sa mga giimbitahan ang Department of Interior and Local Government, Philippine National Police, Armed Forces of the Philippines, Department of Tourism, National Culture and the Arts, Department of Education ug Department of Public Works and Highways.
