DAVAO CITY – Magpahigayon ang Department of Education (DepEd)-Davao ug random mandatory drug-testing program sa tanan nga mga opisyal ug empleyado sa gobyerno kalakip na sa mga teaching ug non-teaching personnel sa Department ilalom sa ilang Drug-Free Workplace Policy.

Una ng nag-isyu ang DepEd ug Drug-Free Workplace Policy kaniadtong milabay nga bulan sa Hulyo aron nga i-promotar ang luwas ug himsog nga work environment sa DepEd ug mga tulonghaan nga walay suliran sa ginadili nga droga ug panalipdan ang kaayohan sa mga tinun-an batok sa posibleng mga empleyado nga migamit niini.

Una ng gibutyag ni DepEd-Davao spokesperson Jenielito Atillo nga ang nahisgutan nga drug-testing program ang giplanohan na na sa departamento sukad kaniadtong milabay nga tuig apan nakumpirma lamang kini human ang pagmugna sa Drug-Free Workplace Committee kaniadtong milabay nga bulan sa Marso pinaagi ni Education Undersecretary Alberto T. Muyot.

Ang Drug Test Certificate i-isyu kanila ug ilakip sa employment requirement records. Alang sa mga empleyado ug opisyal, ipahigayon sumala pa ang testing sa mga gibansay nga DepEd personnel pinaagi sa specimen collections diin isumite kini sa Department of Health (DOH) aron nga sayron ang resulta.

Pinasikad sa DepEd Order 37 kalabot sa Drug-Free Workplace Policy, gikanayong ang mga empleyado o teaching ug non-teaching personnel nga magpositibo sa confirmatory test himuon sumala pa kini nga basehan nga papahawaon kini sa trabaho.