DAVAO CITY – Mas daghanang presensiya sa kapulisan ug kasundalohan ang mamatikdan karon sa dakbayan sa Davao gumikan sa daghanang aktibidad nga ipahigayon karung semahan isip kabahin sa kasaulogan sa Kadayawan sa Davao.
Gawas sa kapulisan kalakip sab sa mga gipakatag ang mga volunteers ug police auxiliary aron lamang masiguro nga luwas ang tibuok semana nga selebrasyon sa kapiyestahan.
Sa listahan sa Davao City Police Office (DCPO), mikabat sa 10 mil ka mga personahe ang ipakatag sa mga nagkadaiyang lugar sa siyudad diin gilangkuban kini sa 1,530 personahe sa Regional Public Safety Battalion, 2132 ang police auxiliary, 376 police trainee, sakop sa DCPO ug daghanan pa.
Subli sab nga nagpahimangno si DCPO head Senior Supt. Alexander Tagum nga hugot pa gihapon nga gidili ang pagdala ug mga backpacks, canisters, pagsuot ug sunglasses, kalo ingon man pagdala og mga hinagiban.
Ipakatag ang mga personahe sa downtown area ingon man sa mga suok nga dapit sa dakbayan aron nga masiguro nga dili makapahimulos ang mga dautang elemento.
