DAVAO CITY – Hugtanon na sab nga ipatuman sa lalawigan sa Davao Oriental ang Provincial Anti-Smoking Ordinance ngadto sa tanan nga mga pampublikong tulonghaan human nga hingpit na kini nga gilagdaan ni Gov. Nelson L. Dayanghirang.
Tipik lamang kini isip paghatag ug suporta sa kampanya sa gobyerno nga ipabilin ang maayong panglawas sa publiko ug malikay sa mga sakit nga makuha sa kanunay nga pagpanigarilyo.
Aron nga mas mapalig-on pa ang pagpatuman niini sa lalawigan, ipagula ang Implementing Rules and Regulations (IRR) sulod sa unom ka adlaw human ang pag-apruba sa gobernador.
Segun ni Governor Dayanghirang ang maong ordinansa nga gipailalom sa public consultation sa Sangguniang Panlalawigan ang istrikto nga ipatuman latas sa probinsiya.
Gikanayon sab ni Board Member Laureano B. Taya, SP Chairman sa Committee on Health and Sanitation, nga maoy author usab sa ordinansa, pahamtangan ang si bisan kinsa man nga mga indibidwal nga makalapas niini diin anaa sa P300 ug P500 ang first ug second offense samtang P1,000 ug pagkabilanggo alang sa third offense.
