DAVAO CITY – Aduna na matud pay lead ang mga sakop sa Davao City Police Office (DCPO) kalabot sa mipatay sa usa ka habal habal driver niining milabay nga adlaw sa Buhangin ning siyudad.
Matud pa kang DCPO Spokesperson Sr. Inspector Maria Theresa Plaza Gaspan, naila na matud pa karon sa Buhangin Police Station ang gikanayong “person of interest” sa pagpatay kang Eduardo Vargas Dela Torre, 52 anyos, residente sa Bacahoa Village, Cabantian Buhangin.
Kahinumduman nga gawas sa pagpatay kang Dela Torre, gikawat sab ang gimaneho niini nga sakyanan ingon man personal nga mga butang.
Hinuon dili pa mabutyag sa kapulisan ang pangalan sa suspek gumikan kay nagpadayon pa ang ilang gipahigayon nga follow up investigation.
Gumikan kay naila na sa Buhangin police ang responsable, naglaom sila nga masulbad gilayon ang maong krimen.
