DAVAO CITY – Aprubado na sa ikaduhang pagbasa sa konseho ning siyudad ang ordinansa nga mag-amyenda sa pipila ka mga probisyon kalabot sa plano nga pagbalhin sa Museo Dabawenyo sulod sa People’s Park ning siyudad nga kasamtangang nahimutang sa A. Pichon Street.
Gikanayong gitangtang ang pulong nga “permanent and exclusive home” nga unod sa kanhi ordinansa subay sa hangyo ni konsehal Jimmy Dureza aron nga mamahimo kini nga ibalhin sa bisan asa man nga lokasyon sa umaabot nga panahon.
Ang pagbalhin sa Museo Dabawenyo kabahin sa plano sa lokal nga panggamhanan alang sa pagtukod sa P100-million nga kantidad sa modernized museum.
Gitataw sab ni Konsehal Bernard Al-ag, nga kinahanglan ang pag-amyenda sa ordinansa aron nga walay mamahimong suliran sa higayon nga sugdan na ang pagtukod niini sa bag-ong lokasyon o kung i-endorso na ang maong plano ngadto kang Pangulong Rodrigo Duterte aron nga mapundohan.
Una ng nagpahigayon kaniadtong milabay nga semana ug ocular inspection si Konsehal Pilar Braga sulod sa People’s Park ug nagtuo ang opisyal nga maayo ang lokasyon diin ipahumutang ang museo.
